صباح الخير ..
الكل بقى شغال .. اي زول بفتش عن عمل ..
ولانو انا بتعاطف جدا مع النسوان واجتهادهن
بعد مسؤولية البيوت والعيال ..
اضيف لهن عبء جديد وهو الضرورة الملحة وجدا وبالذات الفترة دي في انهن يساهمن في حل مشاكل البيوت المادية والواقع الافرزتوا الحرب دي من هجرة الاهل والاحباب والجيران والحوجة لكل مليم لسد افواه جائعة واجساد معتلة ..
محبة وتقدير ومودة لسيدات المملكة العربية السعودية وساكناتها
وانا شاهدة علي ابداعهن ومجهودهن المبذول .. ودا الخلاني زبونة دايمة ليهن وللبقدمنو ..
الاعلان جزء كبير من نجاح اي شغل.. وطالما انا ماعندي شيء اعمله للسيدات في اي محل في العالم البقدر عليه انو الفترة الجاية حاخلي من الحيطة دي تشتغل لعرض. منتجات (الجميع) رجال ونساء مساهمة في جعل الناس تتعرف علي البقدموه ولانو معظم الشغل اون لاين ممكن الناس تشتري منهم وهم مامعاهم في نفس المحل
بعض منهم انا اشتريت منتجاتهم
وبعض منهم اهدوني. شيء من خيرهم.. وواحدين انا ما بعرفهم بس الحتة مفتوحة ليهم للاعلان
ونقسم الايام
يوم لناس التياب
ويوم لناس الاسسكوارات
وليوم لناس الدهب
وليوم لناس البيزنس المتنوع
ويوم لناس الخبيز والماكولات
حتي اصحاب المواهب التانية في اي نوع من انواع الاعمال الحرفية
عيادات التجميل والعيادات الطبية
انا حادي الريفيو حقي للاتعاملت معاهم وحاخت صورا الوصلني منهم ورايي فيه.. وعليه اي زول عايز يدي فيدباك وريفيو لخدمة استفاد منها او صاحب عمل حابي يعرض عمله من نفس نوع البوست في اليوم داك
ربنا يفتحها علي الجميع
ودي صور لبازار
الاول في الرياض من دكتور امنة
والتاني بازار عاملاها اختنا السمحة ستهم في لندن
خدمة للسيدات ومنتوجهن
ربنا يفتحها علي الجميع
ويسهل امرنا وامر اهلنا للبنلاقيه الايام دي وانا عارفة انو دا مجرد ملعقة سكر في بحر مر جدا
كل المودة
تماضر
