د.تماضر الحسن تكتب: علمتني الحياة ...

 

الدنيا ماشة  علي نهاية سنة 

لو زول سالني  شنو  البقيت متاكدة منه 

حاقول  انو السعادة  دي  قرار 

قرار فردي تماما 

احنا البنسعد نفسنا او نشقيها 

وانو السعادة  الكل بفتش عنها   اسبابها مختلفة من  شخص  للتاني 

كلنا عارفين شنو الببسطنا وشنو البحزنا بس  في كتار  لاسباب تانية مستعدين  يفرطوا في سعادتهم  عشان خاطر  الحولهم يرضوا عنهم .. وعشان هم ماحابين  يبعدوا عن اماكن راحتهم 

comfort zone 

او  لانهم ما واثقين من روحهم ومن خياراتهم ... 

او بدوا فرصة للحولهم ديل ايا كانوا سواء كانوا اسرة او اصدقاء او حتي مجتمع انو يوروك  شنو المفروض يبسطك وشنو المامفروض يبسطك 

وبتدخلوا في شيء  تماما شخصي  ... 

انا بقيت متاكدة  انو مفتاح سعادة اي شخص في يده ...  واهم ركن في السعادة انو المفتاح دا لا تديهو للدنيا ولا  للناس .. ايا كان الناس ديل منو 

انت بس 

ما تخلي اي جهة تتحكم فيه .. 

اكتر شيء في رايي   بفسد حياة الناس    وبتعسهم  انو الواحد ما يقدر يستغل المتاح قدامه من ظرف  لرؤية  السعادة  الفيهو ...

او حتي تطويع المفروض  قدامك  لتلمس الخير الفيهو 

 والحتة دي تحديدا  فيها جانب احسان الظن بالله سبحانه وتعالي 

مهما بلغ سوء  الشيء الحولك   وصعوبة الانت بتمر بيهو   فهو ما بستمر  وحيتغير  وانا حاستفيد منه...  من وجوده ومن تغير الظرف  دا بعد داك 

 

مافي شيء بحصل  من غير سبب في حياة الناس ..   

الرضا هو  سنام الامر 

كلما رضيت  وقبلت  كلما احسنت التصرف واصبحت اكتر قدرة علي  تلمس  الطريق حولك .. 

وعلي النقيض الزعل والحنق والحزن والغضب بفقدوك القدرة علي الشوف 

علي منفذ الخروج 

الحزن طاقة تعطل الناس  وتفقدهم الاتزان 

اي مشكلة حلها جواها واي مشكلة ترياق لمشاكل قدام 

بتخليك انضج واوعي وافهم 

اما   قصة انو تجعل من سعادتك انت مربوطة بالناس  باختلاف درجات علاقتك او قربك منهم فدا اكبر فخ 

ودا برضو عندو اسبابه 

في ناس حولنا لما يعرفوا انهم سبب (سعادتك) بحرصوا علي اعطاءك النقيض  وبتفننوا في انهم يتعسوك .. 

ولانهم بشر    ممكن يمشوا او يتغيروا او تكتشف انهم عمرهم ماكان بالبهاءاالانت كنت شايفه دا .. ولاننا احنا كبشر  في الاغلب بنشوف الناس  علي حسب حوجتنا ليهم او توقعنا منهم .. 

والاغرب اننا بنشوف بعض  علي اساس البنعكسه نحنا عن انفسنا 

يعني انا بشوف زيد وعبيد من الناس  علي حسب رؤيتهم لروحهم 

دا بخلي  بعضنا يستغل  نقاط ضعف الحوله لتوريثهم الهم والغم والعذاب 

 فكل ما انت  كنت مشع سعادة تخصك ورضا بالعندك  واقتناع بما وهبت 

القدامك ماعندو حل غير يستمر معاك كدة او كمان يمشي   اذا ما كان حريص انو يبقي ( اضافة  حقيقية) لمسيرة حياة  فيها البشر يعضدون ويدعمون ويسندون ويكونوا جزء من الببسطك في الدنيا ... 

الظروف احنا ما بنختارها  لانها جزء من القدر حقنا  البنختاره  هو طريقة تعاملنا مع الظروف دي ...  بتبقي اكتر سعادة كلما انتصرت علي الكالح منها واحتفظت بابتسامتك علي وجهك 

اما الناس .. فاعتزل من يؤذيك منهم 

اخفض سقف توقعك وطموحك من الحولك. عاطفيا واجتماعيا وماديا   تسلم 

والله تسلم 

تسلم وتسعد وتغنم 

لا تضع حمولك علي احد .. ولا ترسم خطة في حياتك تخصك انت علي المستوي الشخصي  تقوم علي وجود شخص  بعينه   وتعتمد عليه في انجاحها ... 

لانو دي مسالة توفيق وحظ 

اذا وجدت  في حياتك ناس  بعضدوا وبسندوا وبعرفوا  يقيفوا لبعض 

خير وبركة 

واذا حصل العكس .. انت اصلك لم تضع  الكثير علي كتف العلاقات 

مافي شيء باذي الناس الا الناس 

لا كوارث ولا زلازل  ولا براكين ولا فيضانات ولا  غضب طبيعة  يهدد سعادة البني الادم اكتر من اخيه الانسان 

 عشان كدة  سعادتك في  وجودك في وسط  لا تحتاج ان تتعارك فيه 

تتقاتل فيه 

تخذل فيه 

تبرر فبه 

 سعادة البني ادم في جو  تدخله ضاحك وتخرج منه ضاحك لانو الحياة نفسها معترك ما ساهل ما محتاج   ان تمنح مزيد من الاسباب البتخليها اكثر صعوبة 

اجعل  بينك وبين الخلق مسافة. وماتقع بوشك  وتفترض حاجات هي اصلا ماموجودة 

وما بتحتاج اثباتات كتيرة  لعدم مؤاءمة الحولك  ليك 

 فقلب المؤمن دليله 

استفت قلبك 

وابتعد  طالما  كان الحولك مرهق ومنهك .. 

 حياة قصيرة 

والسعادة  قرار  واصرار    ومعرفة 

تماضر 

تمر الرضا