رثاء لإبن اخي: خالد عبدالعظيم

 رثاء لإبن اخي: خالد عبدالعظيم

كلمات: ابراهيم محمد عبدالنور

خربانة ام قدود الما فيها خير وعمار.. 

حكم السيد مطاع الا الصبر جد حار.. 

عمانا الحزن وسكن  القلوب والدار.. 

تبكيك الخلوق يا خالد كبار وصغار.. 

رحل ضو القبيلة والدنيا جد  فراقة.. 

رحل مونة خريفنا الفي المحن دراقة.. 

رحل دخرينا  والعينة البشيل براقة

تبكيك ام الطيور  بي دموع  حراقة.. 

شامخ يا الاصم في علاك ما أدليت.. 

ما باريت  رزيلة  وما اتهنت وانزليت

ما ذكروك بي شينة من صغير تبيت.. 

حافظ لي فروضك ولي محارم البيت.. 

حليلو البيركز وفي المحن صنديد.. 

بار بالوالدين وفي طبعه ديمة فريد.. 

سند الهاكعة لحاق للقريب وبعيد.. 

ما بنوفيه وصفه مهما كتبنا قصيد.. 

تبكيك دار جعل من الحرة جاتنا لواري 

تبكيك نهر عطبرة من قرسي لي قنقاري.. 

 شوقار ناس عنيبس جانا مسرع جاري..   

فيهو رجال تكفكف  لي دموعا  تضاري.. 

زملاك في الدراسة يبكوا دموعهم جارية.. 

تتواتر وفودهم  من كسلا جات متبارية.. 

ود الباوقة اقسم وقال الحقيقة العارية.. 

خالد كان ركيزة الدفعة كان السارية.. 

من تبيت صغير شايل الحمل مطبوق.. 

مشهور بالمروءة ما كنت زول ممحوق.. 

يا المزن المتقل بالخير  معاه بروق.. 

حزنك في الفؤاد راسم جروح وشقوق.. 

التلب الهميم  يا الكان فراقك فجعة

دراك للمستغيث تهدر تهم بي سرعة.. 

الجود والكرم لازمك بقالك طبعة.. 

كرمك للنازحين ولي ضيوف الهجعة..

رحل دراج العواطل تاني عاد مو راجع.. 

ازرفي يا دموعي وزيدي قلبي مواجع.. 

ما بننساهو خالد الفي الطبع متواضع.. 

 يحترم الكبير واب قلبا رحيم بالشافع.. 

تشهد ليك مواقف ايام الحرب و العسرة 

بيتك للنازحين مشرع  يضيف كم اسرة.. 

وافر خيرك يفيض قدحك مستف كسرة

تباشر للضيوف وجهك مجافي الكشرة..

يا حليلو خالد الواصل لي جميع ارحامو

يا حليلو خالد الراسي ورزين في كلامو...

جرحه فينا غائر  و تزيد دوام  آلامو..

في جنات عدن  يا رب تعلي مقامو..