أيقونة الشعر السوداني داليا الياس تكتب

أنا المابتشبهني غير صورة المرايا.. 

وأنا الشامخة البقش دمعي

وأغني...

أنا الما بسمع الظن والوشاية....

وأنا المغروسة جوة الناس تمني...

أنا الكم ياما أبدعوا فى أذايا.. 

وجيتهم بى إبتسامة وشوق أهني..

***

أنا الصانت عهود الريد حقيقة...

وما باعت حبايبها للهوان...

أنا البشتاق وبعشق كل دقيقة...

وأنا المبهولة وسط الخوف أمان...

أنا البادرتا بى مليون طريقة..

عشان أملأ الشرايين بالحنان...

***

أنا الما بستحق جور الأحبة...

وأنا المليانة فى الهوى بالمظالم...

أنا الحيرتا بى قلبي الأطباء..

وأنا الصدق البينقط والله عالم...

أنا الأحرزتا جواك (أعلى نسبة) ...

وأنا المطلوبة فى كل (القوائم) ..

***

أنا البسنِّد قفاك زى الركيزة   ...

وأنا الطيبَّة البضَلل زى سحاب...

أنا الفينى المكارم جّت غريزة.. 

وأنا المكسورة من غدر الصحاب...

أنا الكم عشتا فى خاطرك عزيزة..

وأنا المحسوبة فى النسيان غياب...

***

أنا المافينى فرقة وجعة تاني...

وأنا المسجونة فى كهف الكرامة...

أنا الأسرفتا فى نسج الأماني...

وأنا المحفورة فى جواك علامة...

أنا الجازانى بالهجران زماني...

وأنا المجروحة لى يوم القيامة..

د(اليا) س