عندما يكون من يكتب المقال في مقام الدكتورة الاعلامية المخضرمة استاذتي وصديقتي الرمز الاعلامي بخيتة امين صاحبة اشهر عمود صحفي في الاعلام السوداني "جرة قلم" وعن سلوك انثوي سوداني قبيح وكمان خارج حدود الوطن، نقول ياريت لو متنا كلنا وما نزحنا.
اليكم المقال كما هو لتعرفوا لماذا لا ياتي البلاء للسودان.
بخيتة امين تكتب من القاهرة: الغربة سترة حال وفي (كعابيش يتدخنن)..
خيوط الحزن تلتف حول عنقي، ورنين هاتفي لا يتوقف، وسلاسل الرجاءات (عليك الله اكتبي وما توقفي) والحاصل شنو؟.
نقلوا لي..
في شارع جده يرتدون الملابس الخليعة والشفافهة وشباشب السفنجه.
وفي المروه وعند محلات بيع السمك يتعالي صوت الطلبات دون اعتبار لمن سبقوا وقوفا في صف الانتظار (ومعاها عبارات عاوزين دكوه جامده).
وفي شارع شهاب (الشحده و روشتات الادوية الكذوبة.
وفي شارع جده بينما صبي في العاشره من عمره وامام محلات البطاطس يهم بشراء حاجته اذ باخرين (يلفحون) ما بيده لكن كاميرات المراقبة فضحت السارق وهو من (عندياتنا).
ده كلو هين..
والقصة الاليمة التي يتداولها الناس عنا
وبكل الاسف العميق ان حيا يطلق عليه (كعابيش) يقع في قلب مدينة الفيصل حيث الاسر السودانيه بما يفوق التعداد تفتحت عبقرية ساذجة لفتح دكان لبيع الدخان للنساء والدخان يغطي سماء الحي والشارع المكتظ بالناس والسكان والدكاكين ونساء السودان (بالصف) والساعه بما يعادل (١٢٠) جنيه مصري.
نحن في السودان نعشق الدخان ونمارسه في زقاق خلف البيت او داخل حجره او ركن قصي لانه امر (انثوي) ولما اشتد عدم احترامنا لغربتنا وعدم احساسنا بمرارة الانكسار و ذلة الغربة و انكسار خاطرنا، هل يعقل ان نتناسي مرارة المحنة و(الرماد في خشومنا) ونفكر في الدخان وكمان في الشارع؟؟
يا نساء يا بعض من نساء..
المكارم خلقت لنا نحن نساء السودان..
نحن امة مسلوبة الوطن منزوعة الروح..
نحن امة سودانية مهما قست علينا الحرب لن نهيل التراب على تقاليدنا واعرافنا بسبب غياب بصيرة بعض من رجالنا وهم يرون الذي تمارسه بعض من اسرنا في غربة (بايخه)..
نحن بلد يمتلك افضل اخلاق وسيرة سمحه وسمعة باذخه وبيوت وحيشان ورجال ونساء واسماوءنا مدونه على قمر اربعطاشر)..
ايها الرجال
ايها الاخوان
ايتها الامهات
ايتها الاخوات العارفات
ارجو ان نقرا حروف هذا المقال حتي لا ينفلت منا الزمان..
ونريد العودة لبلادنا لتزدهي بنا جدايل التاريخ وتشتعل الاساطير بصمودنا وعزمنا وسماحة مسلكنا..
ونعود لارض الجمال وعقود السوميت ومسابح الكهرمان ونفرح بالسودان ونلتقي الأحبة والجيران..