مبارك البلال (الكلام الساخن): ممنوع القراءة لأصحاب القلوب الضعيفة

 

قال تعالي (انك ميت وانهم ميتون) ولعن الله من اشعل الحرب..

 مولانا منال محمد الحسن المحاميه الشهيره صديقه عزيزه وكاتبه مميزه معنا بصحيفة الدار باسلوبها الساحر الساخر هي امدرمانية الاصل تبغض العنصريه محبوبه.. بسبب هذه الحرب تشردت شانها شأ ن الاخرين جاء شقيقها ربيع مشتاقا ليقضي معها اجازته بالسودان لتفرقهم الحرب ويفرقهم الموت كل في مكان رحل فجاة ربيع الدنيا وترك الما كبيرا في نفسها فماذا كتبت وهي ترثيه بهذه الكلمات الحزينة..

ربيع الدنيا يا نور عيني سلامة عينك والف حمدا علي السلامة

عملية بسيطة بس الما بسيط فرقتنا والشتات..

قدر الله ان تنهي غربتك وتعود الوطن ونفرح  بيك وتاتي الحرب اللعينة وتفرقنا مرة اخري كل في بلد..

املنا في الله نعود للوطن ويعم السلام ونرجع تاني نمشي نشرب الشاي في الشارع مع صحبتنا الفي شارع الوادي او الشنقيطي

وتاني نعود كما كنا تحكي لي سرك واحكي ليك اسراري ونتعاهد علي دفنها في تراب الارض القاعدين فيها

كم وكم قد دفنا كثير من الاسرار في عمق الارض فهل ياتري قامت المليشيات بحفرها وسرقتها كما سرقوا الديار والعمار..

تذكرت ايام نمشي السفارة الحبشية في الخرطوم وناكل الزغني ونشرب القهوة ونتسكع في الشوارع وانا فخورة بيك ونفسي اقول لكل الدنيا دا أخوي 

واتذكر لمن تمشي معاي المنتدي ويجوا ناس هاني ورحاب رحاب الفاضل المهدي يتونسوا معاك بره ..

ياااخ تفاصيل كتيرة

مجيك لينا في المكتب والفطور وشراب القهوه وونستك مع كل ناس عمارة الحرية..

تذكرت ايام اجي اقعد معاك يوم يومين في ابروف وانوم اصحي القاك تصلي صلاة الليل وبعدها نتونس للفجر لا بنكل لا بنمل..

اتذكر. شنو واخلي شنو 

كانت قمة المتعة أن  نخرج سويا حتي في شهور الحرب الاولي جلسنا نحتسي الشاي وصوت الرصاص في اذاننا وست الشاي لا تبالي.. 

امانينا صغيرة في وطن حدادي مدادي بشرط وجود.سلام وامن

تعودت ان اكون معك في اي مستشفي او  عند طبيب.. 

وحتي هذة اللحظة اتذكر  يوم ذهبنا عيادة مركز الرومي لالم الم بك وخرجنا من العيادة  وبعدها بقليل وقعت الدانة بالمركز ..

ولا انسي كذلك عندما ذهبنا لمستشفي امدرمان ومعك ميمي واعزاز ومحمد.بابكر وتم توقيفنا ونجونا من كارثة بفضل الله

كل هذه التفاصيل اتخيلها امامي 

ولكن سرعان ما افترقنا قالها الدمع فما ابصرت شيئا ..

اعرف انك وبحمد.الله تنعم وسط اخواتك واهلك في القاهرة وما بقصروا فيك واختك الصغيرة ايمان محمد الحسن معاك و ما بتقصر وما مشحودة عليك

لكن جد مشتااااااقة ليك

ولما ترجع بالسلامه وترجع ايامنا الجميلة 

لما ترجع يا ربيعي للقليب

 المشتهيك..

حاجه اخيرة:

لطفا وليس امرا دعواتكم لربيع بالرحمه والمغفره وهو ما يفيد الميت وليس البكاء.